ప్రముఖ సినీ నటులు శ్రీకోటశ్రీనివాసరావు పూర్వాశ్రమములో భారతీయ స్టేట్ బ్యాంక్ లో పనిచేసేవారు. ఆరోజులలో నాటకరంగం, సినీరంగం మీద మమకారం చేత ప్రమోషను వద్దని, టెల్లరుగానే వుండిపోయారు. నారాయణగూడలోని శాఖలో ఆయనతో పనిచేసేవాడిని. ఆయన నిజజీవితంలో కూడ ఎంతో హస్యముగా మెలిగేవారు. (పెద్దవాడుకదాని ఇప్పుడు బహువచనం గాని, అప్పుడు "ఏరా" అనేగా సంభోధన). నేను అక్కౌంటెంటు గిరిలో వెలిగిపొయెవాడిని. ఆయన మద్యాహ్న్ం రెండున్నరకల్లా, నగదు హెడ్ కి అప్పచెప్పి రిహర్సల్సు గట్రా అని తుర్రుమంటువుండేవారు. నేను పలహారానానికని శ్రీ ల్.య్ స్.యన్. మూర్తి (మరో ప్రముఖ రచయిత,నటుడు, ల్.బి.శ్రీరామ్ సోదరుడు)తో, బయటకు వెడుతూవుంటే, బ్యాంకింగ్ హాలులో, ఓ నవయువకుడు, ఒక్కడే కూర్చునివుండటం గమనించాను. వ్యాపారవేళలయిపోవటంతో, "ఏందుకున్నావు" అని ప్రశ్నించాను. ఆ యువకుడు "కొత్తనోట్లు ఇంకా ఆరలేదాండి". అనడిగాడు. "కోత్తనోట్లేమిటి, ఆరడమేమిటి" అనడిగాను.
"ఆ టెల్లరుగారు కొత్తనోట్లు ఆరుతున్నాయి. కూర్చొమన్నారండి." అన్నాడు. అప్పుడు అర్ధమయ్యింది శ్రీకోటాగారి హాస్యం. ఈ కుర్రడు, శ్రీకోటావారిని, తనకి కొత్తనోట్లు కావాలని అడిగుంటాడు. ఆయన తన సహజ హాస్యధోరణిలో, "కొత్తనోట్లా, అరుతున్నాయి, కూర్చోమ్మా" అని ఆయన ఆ పేమెంట్ పెండింగులో పెట్టి తనమానాన తను వెళ్ళిపోయాడు. ఆ కుర్రడికి వున్నంతలో మంచి నోట్లిచ్చి, మేము శ్రీకోటా గారి సంగతి మర్నాడు చెప్తే, "ఈ కాలేజీ కుర్రాళ్ళకి బొత్తిగా బ్యాకింగ్ తెలియదురా" అని నోచ్చుకున్నాడు.